Қарағандыда коронавирус жұқтырған 3 адам ауыр халде жатыр
Олардың барлығы індетке қарсы қауіпсіздіктің қажетті шараларын сақтай отырып оқшауланған және ем қабылдауда.
Қарағанды облысында 6 сәуірдегі жағдай бойынша коронавирус жұқтырғандардың жалпы саны – 48. Үш науқас реанимацияда ауыр халде жатыр, олардың біреуі өздігінен тыныс алады. Тағы үшеуінің жағдайы – орташа ауыр деңгейде.
Барлық жұқтыруы мүмкін адамдарды анықтау үшін мұқият эпидемиологиялық тексеру жүргізілуде. Вирус жұқтырған адамдармен байланыста болғандар оқшауланған.
Қарағанды облысында үй карантинінде 1 346 адам жатыр. 862 пациент тәулік бойы бақылауда, оның ішінде 48-і инфекциялық стационарда.
Пневмония мен ЖРВИ-ға күдігі бар науқастарды емдеу үшін облыс қалаларында пульмонологиялық орталықтар ашылды. Вирустық инфекциямен ауыратын науқастарға мамандандырылған жедел бригадалар қызмет көрсетеді.