Қарағандыда Әйелдер кәсіпкерлігін дамыту орталығы ашылды
2022 жылғы 17 наурыз 02:12

Қарағандыда Әйелдер кәсіпкерлігін дамыту орталығы ашылды

ҚАРАҒАНДЫ. ҚазАқпарат – Дұрыс бизнес стратегиясын жасап, стартап үшін ақшаны қайдан алуға болады? Қарағанды облысында кәсіпкерлік бастамасы бар әйелдерге көмек көрсету орталығы ашылды. Оның қызметтері тегін, деп хабарлайды ҚазАқпарат тілшісі.

«Бүгінде Қарағанды өңірінде 42 мыңнан астам компанияны әйелдер басқарады. Бұл көрсеткіш одан да көп болуы мүмкін. Ынтымақтастық қорының, Ұлттық экономика министрлігінің, ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссияның, «Атамекен» ҰКП серіктестігі аясында Қарағандыда әйелдер кәсіпкерлігін дамыту орталығы ашылды. Республикалық жоба Азия даму банкінің қаражаты есебінен қаржыландырылады және БҰҰ-ның Қазақстандағы Даму бағдарламасы іске асырады», – деді Өңірлік кәсіпкерлер палатасының директоры Ернар Күлпейісов.

Орталықта болашақ кәсіпкер ханымдарға да, өз ісі барларға да қаржылық емес қолдау көрсетіледі. Мұнда мамандар кеңес береді, жаңа бағыттарды үйретеді, даму жолын анықтауға көмектеседі.


«Әйелдер кәсіпкерлігі қазір белсенді дамуда. Бірақ әрдайым ақпарат, негізгі білім, батылдық жеткіліксіз. Орталық жақсы демеу болады. Кез келген әйел мұнда хабарласып, сұрақтары мен күмәнданған мәселелеріне қатысты жауап ала алады. Білікті маман тұрақты негізде жұмыс істейді, жұмыс аптасы барысында қабылдайды», – деп атап өтті Қарағанды облысы іскер әйелдер кеңесінің төрайымы Гүлия Жәңгірова.

Орталық 1 наурыздан бастап жұмыс істейді. Консультант Арайлым Серікбайдың айтуынша, жарты айдың ішінде 30-дан астам әйел, оның ішінде шалғай ауылдардағы бастауыш кәсіпкер әйелдер өтініш білдірген. Сұрақтар негізінен бизнесті жүргізу, мемлекеттік гранттар, субсидиялар алуға қатысты болды. Сондай-ақ бизнес-тренингтер бағдарламасына қызығушылық танытты.

Орталық қандай қызмет көрсетеді:

- бизнес жүргізу сұрақтары бойынша кеңес беру;

- оқыту (тренингтер, шеберлік сабақтары);

- тәлімгерлік (6–9 ай);

- әлеуетті және сұранысты ескере отырып, бизнесті дамыту стратегиясын әзірлеу;

- кооперация және әлеуметтік кәсіпкерлікке оқыту;

- әйелдер кәсіпкерлігі өкілдерінің халықаралық жобаларға қатысуына жәрдемдесу (кәсіпкер әйелдерді хабардар ету);

- қаржыландыруды тартуға оқыту (краудфандинг, инвестициялар, гранттар, лизинг).

Әйелдер кәсіпкерлігі орталығы мына мекенжайда орналасқан: Қарағанды қ., Ермеков к-сі, 29 (1-қабат). Байланыс телефоны: (8-7212) 50 64 12.


Ұқсас жаңалықтар

Jańalyqtar

Үрдіс

MURAǴAT