Қарағандыда ашық аспан астындағы кітапхана ашылды
«Биыл ашық аспан астындағы жазғы оқу залын алтыншы рет өткізіп отырмыз. Форматы бұрынғыдай. Кітап оқитындар мен жалпы осы іс-шараға қызығушылық танытып жатқан адамдар саны жыл санап артып жатыр. Мысалы, біз былтыр үш айдың ішінде 800-ден астам адамға қызмет көрсеттік. Оқырмандарға 2 893 кітап тараттық. Біз кітап сүйер қауымға кітапхана қорынан емес, бізге тегін берген кітаптарды ұсынамыз», - деді Н.В. Гоголь атындағы Қарағанды облыстық әмбебап-ғылыми кітапханасының директоры Айнұр Шаймұханбетова.
Адамдар өздері оқыған кітаптарын әкеліп, оларды қызықты кітаптармен алмастыру үшін келеді. Ұйымдастырушылар бес жылдың ішінде 3 мыңнан астам адамға, соның ішінде 400 балаға қызмет көрсеткен.
Жазғы оқу залы 14 маусымнан 23 тамызға дейін аптасына екі рет (сейсенбі және бейсенбі) сағат 11-ден 16-ға дейін жұмыс істейді. Ол Әлиханов көшесінде білім беру басқармасының ғимаратына қарама-қарсы саябақта орналасады.