Қарағандыда Әлихан Бөкейханның 15 томдық шығармалар жинағы жарық көрді

ҚАРАҒАНДЫ. ҚазАқпарат - Қарағандыда «Әлихан Бөкейхан және Қазақстан тәуелсіздігінің тарихи негізі» атты халықаралық ғылыми-тәжірибелік конференция өтуде, деп хабарлайды «ҚазАқпарат» ХАА тілшісі.

«Әлихан Бөкейхан - шындығында біртуар саяси тұлға. Әлихан Бөкейханның 150-жылдық мерейтойы тек Қазақстанда емес, сондай-ақ Түркия, Ресей және басқа елдерде тойлануда. Бұл оның қазақ халқының алдындағы тарихи еңбегін айқындайды, - деді Қарағанды облысының әкімі Нұрмұхамбет Әбдібеков конференцияның ашылуында.

«Жыл бойы облыстың барлық аудандарында тарихи тұлғаның 150 жылдық мерейтойы ғылыми-тәжірибелік конференциялар, мәдени шаралар ретінде өткізілді. Оның туған өлкесі саналатын Ақтоғай ауданында «Алаш» қозғалысы жетекшісінің ескерткіші орнатылды. Ескерткіш орнату Қарағандыда да жоспарлануда»,-деді ол.

Өңір басшысы Түркия, Оңтүстік Корея, Ресей, Украина, Қырғызстан елдерінен келген конференция қатысушыларына алғыс айтты.
«Ә.Бөкейхан шығармалар жинағы» атты «Алаш» қозғалысының көшбасшысының 15 томдық шығармалар жинағы шығарылып, тұсауы кесілді.