Қарағанды облысының төрт ауданында шегірткеге қарсы у себілді
10:05, 19 Шілде 2022
ҚАРАҒАНДЫ. ҚазАқпарат - Қарағанды облысында ауыл шаруашылығы жерлерін химиялық өңдеу бойынша жұмыстар аяқталды. Мамандар 8 мың гектарға жуық жерді өңдеді, деп хабарлайды ҚазАқпарат тілшісі.
Қарағанды облысының төрт ауданында саяқ шегірткелерді жою үшін химиялық өңдеу жасалды. Жұмыстар «Ауыл шаруашылығы дақылдарының зиянды организмдеріне қарсы күрес жөніндегі іс-шаралар» бюджеттік бағдарламасы шеңберінде жүргізілді. Жалпы алғанда, мемлекеттік жер қорларына жататын 7890 га жер өңделді.
«Химиялық өңдеу Абай ауданының Есенгелді ауылдық округінде 900 га алаңда, Бұқар Жырау ауданының Ақбел ауылдық округінде – 1500 га, Нұра ауданының Пржеваль, Егінді, Ахмешіт және Көбейтас ауылдық округтерінде – 1950 га, Қарқаралы ауданының Ынталы, Аманжол және Темірші ауылдық округтерінде – 3450 га жерінде жүргізілді», – деп хабарлады Қарағанды облысының Ауыл шаруашылығы басқармасында.