Қарағанды облысында мал азығын дайындау еселенеді
2022 жылғы 17 мамыр 03:23

Қарағанды облысында мал азығын дайындау еселенеді

ҚАРАҒАНДЫ. ҚазАқпарат – Қарағандылық фермерлер 80 мыңнан астам гектар жерге біржылдық және көпжылдық жем-шөп егуді жоспарлап отыр. Бұл жұмыстарға 30 мыңға жуық техника жұмылдырылады, деп хабарлайды ҚазАқпарат тілшісі.

Қарағанды облысында мал шаруашылығы тұрақты дамуда. Мал басы артып келеді. Өңірде жем-шөп дақылдарын өсіру де артады. Бұл саланы дамытуға қолдау көрсетілмек. Өңір басшысы Жеңіс Қасымбек субсидия мәселесін шешуді тапсырды.

«Мал шаруашылығын дамыту үшін берік жем-шөп базасын құру қажет. Жем-шөп дақылдарының егіс алқаптары ұлғаюда. Биыл 81,5 мың га көпжылдық және біржылдық шөптер егіледі. Бұл өткен жылдың деңгейінен 9 мың гектарға артық. Сондай-ақ жемдік дақылдар егісі де артып келеді», – деп хабарлады Ауыл шаруашылығы басқармасының басшысы Асқар Санаубаров аппарат кеңесінде.

Фермерлер жем әзірлеу үшін техника дайындап жатыр. Басқарманың ақпараты бойынша, 30 мыңға жуық машина мен агрегат іске қосылады.

Асқар Санаубаров облыста ет және сүт өндірісі тұрақты артып келе жатқанын да атап өтті. Фермерлер мал басын, соның ішінде асыл тұқымды мал басын толықтыруда. Жыл басынан шаруашылықтар 438 бас ірі-қара мал және 664 жылқы сатып алуға несие қаражатын алды.

2021 жылы облыста мал шаруашылығы саласында екі жоба іске асырылды: «Құрма» агрофирмасының құс фабрикасы жаңғыртылды және асыл тұқымды репродуктор салынды. Биыл жоспарланған тоғыз жобаның екеуі іске қосылды. Шет ауданында жаңа сүт-тауар фермасы және Бұқар Жырау ауданында құс фабрикасы салынды.

«Жылдан-жылға ауыл шаруашылығы өнімдері өндірісінің тұрақты артуы байқалады. Бұған мемлекеттік қолдау, оның ішінде субсидиялар түріндегі қолдау ықпал етеді. Біз мал шаруашылығын дамыту үшін барлық мүмкіндіктерді барынша пайдалануға тиіспіз. Жем дайындау науқанына уақытылы дайындалу керек. Ауыл шаруашылығы басқармасы Қаржы басқармасымен бірлесіп, ауыл шаруашылығы малдары үшін жем-шөп шығындарын субсидиялауға қаражат бөлу мәселесін қарастырғаны жөн», – деді Жеңіс Қасымбек.


Ұқсас жаңалықтар
Ақтөбе облысында бір жарым жылға жететін жемшөп дайындалады
2022 жылғы 9 тамыз 20:26

Ақтөбе облысында бір жарым жылға жететін жемшөп дайындалады

АҚТӨБЕ. ҚазАқпарат – Ақтөбеде биыл 2,7 млн тонна мал азығы дайындалады. Оның 80% жиналды, деп хабарлайды ҚазАқпарат тілшісі облыс әкімінің баспасөз қызметіне сілтеме жасап.

Ақтөбе облысының әкімі Оңдасын Оразалин жемшөп дайындауға қатысты жиын өткізіп, оған бірқатар мемлекеттік орган басшылары, Ақтөбе қаласы мен аудан әкімдері бейнебайланыс арқылы қатысты.

Облыс әкімі жемшөп дайындау, қорды жинау жұмыстарын жандандыруды атап өтті.

Айта кетейік, биыл облыс бойынша барлығы 2,7 млн тонна немесе бір жарым жылға жететін шөп қоры дайындалады. Бүгінде оның 80 пайызы жиналды.

Оңдасын Оразалин жемшөптің халыққа қолжетімді бағада сатылуын ерекше бақылауда ұстауды тапсырды.

Осы мақсатта аудан орталықтары мен басқа да елдімекендерде арнайы жәрмеңкелер ұйымдастырылады.

Бұдан бөлек, өңір басшысы Ақтөбе қаласы мен облыс аудандарының әкімдеріне, құзырлы мемлекеттік органдарға астық жинау науқаны мен жылыту маусымына дайындықты ерекше бақылауда ұстауды тапсырды.

Әсіресе әлеуметтік нысандарға көмір сатып алу және халықты қамту шараларын қабылдау тапсырылды.



Жетісу: Қаратал ауданында пайдаланылмай жатқан жерлер мемлекетке қайтарылады
2022 жылғы 5 тамыз 19:36

Жетісу: Қаратал ауданында пайдаланылмай жатқан жерлер мемлекетке қайтарылады

НҰР-СҰЛТАН. ҚазАқпарат – Жетісу облысы Қаратал ауданында ірі жер иеленушілердің пайдаланылмай жатқан жерлері мемлекетке қайтарылады, деп хабарлайды Жетісу облысы әкімдігінің баспасөз қызметі.

Қаратал ауданы тұрғындарының облыс басшысымен кездесуі кезінде көтерген мәселесінің бірі – жайылымдық жер жетіспеушілігі. Осыған байланысты Жетісу облысының әкімі Бейбіт Исабаев ауданның біршама ауыл шаруашылығы жерлері ірі жер иеленушілердің қолында болып келгенін ашып айтты.

Солардың қатарында «Шығыс Қаратал», «Бақыт Қаратал», «Үштөбе», «Опытное», «Текелі» серіктестіктері мен басқа да бірқатар шаруашылықтар бар, - деп хабарлайды Жетісу облысы әкімінің баспасөз қызметі.

Мәселен, аэроғарыштық зерттеулердің деректеріне сәйкес Қаратал ауданында пайдаланылмай жатқан 804 га егістік, 74,8 мың га жайылым жер анықталған. Жергілікті әкімдік тарапынан аталған жерлерді айналымға тартуға бағытталған ешбір шара қабылданбаған. Осы ретте облыс басшысы пайдаланылмаған алқаптарды қайтарып, жерді мақсатты игере алатын азаматтарға беру керектігін қадап айтты.

«Бұл мәселені қағаз жүзінде қалдырмай, кабинетте отырмай, ауылдарға барып көріңіз. Аудан әкімдігі бұл жағынан мандытып жұмыс жүргізбеген. Бұлай болмайды!», - деді ол.
Бұл ретте аудан әкімдігіне тиісті сала мамандарымен және құқық қорғау органдарымен бірлесіп, игерілмей отырған ауыл шаруашылығы жерлерін мемлекетке қайтару шараларын шұғыл қолға алуды тапсырды. Ірі жер иеленушілердің жиынға қатысқан өкілдеріне де бұл мәселе басты назарда болатынын ескертті.


Ауыл шаруашылығы министрлігі атқарылып жатқан жұмысты дұрыс түсіндірмейді – Смайылов
2022 жылғы 5 тамыз 12:23

Ауыл шаруашылығы министрлігі атқарылып жатқан жұмысты дұрыс түсіндірмейді – Смайылов

НҰР-СҰЛТАН. ҚазАқпарат – Ауыл шаруашылығы министрлігі атқарылып жатқан жұмысты дұрыс түсіндірмейді. Бұл туралы ҚР Премьер-Министрі Әлихан Смайылов айтты, деп хабарлайды ҚазАқпарат.

Рrimeminister.kz сайтында мәлім етілгендей, бүгін Үкімет басшысы бейнеконференция режимінде жеке бизнес өкілдерінің, «Атамекен» ҰКП және орталық мемлекеттік органдар басшыларының қатысуымен Отандық кәсіпкерлер кеңесінің кезекті отырысын өткізді.

Отырысқа қатысушылар Үкіметтің орта мерзімді кезеңге арналған жаңа экономикалық саясатының жобасын қарады. Ол едәуір экономикалық еркіндікті қамтамасыз етуді, экономиканы әртараптандыруды, экспорттық әлеуетті және еңбек өнімділігін арттыруды, макроэкономикалық тұрақтылықты қамтамасыз етуді, денсаулық сақтау, білім беру және әлеуметтік қорғауды дамытуды көздейді.

«Біз үшін экономикалық өсімнің арқасында азаматтардың әл-ауқатының артуы, табысының өсуі маңызды. Бұл орайда экономикалық өсу тұрақты болуы керек. Осыған байланысты, бірінші кезекте кәсіпкерлікті дамытуға баса назар аударғымыз келеді. Сонымен қатар барлық басқа салалар да құрылымдалып, осы құжатта көрсетілген. Егер бизнес өкілдерінің нақты ұсыныстары болса, оларды ескеруге дайынбыз», — деді Премьер-Министр.

Сондай-ақ ол бизнес-қауымдастық пен азаматтық қоғамды талқылауға белсенді түрде қатысуға шақырды.

Сонымен қатар отырыста агроөнеркәсіп кешенін, тау-кен металлургиясын, көлік саласын, энергетиканы және салықтық әкімшілендіруді дамыту мәселелері қаралды.

Атап айтқанда, бизнестің проблемалық мәселелерін «EPG Education» ЖШС директоры Досым Бесбай, «Олжа Агро» ЖШС директоры Айдарбек Қожаназаров, «Атамекен» ҰКП төралқасының Геология саласы, тау-кен, көмір өндіру және металлургия өнеркәсібі комитетінің төрағасы Николай Радостовец және «Визор Қазақстан» инвестициялық компаниясының серіктесі Алмас Чукин көтерді.

Ауыл шаруашылығын реттеу мәселелерін талқылау аясында Премьер-Министр салалық министрлік тарапынан жіберілген кемшіліктерге назар аударды.

«Ауыл шаруашылығы министрлігі атқарылып жатқан жұмысты дұрыс түсіндірмейді. Сондықтан кәсіпкерлерде не болып жатқаны туралы қате түсінік қалыптасады. Бидайды шығаруға ешқандай тыйым салынған жоқ! Біз квота түрінде шектеулер енгіздік, бірақ оны әдеттегі экспорт көлемінен жоғары қойдық», — деді Әлихан Смайылов.

Үкімет басшысының айтуынша, егер Қазақстан айына шамамен 350 мың тонна астық экспорттап отырған болса, квота биылғы қыркүйек айының соңына дейін қолданыстағы экспорттық келісімшарттарды шектемей, азықтық астықты бақылаусыз жаппай шығарудың алдын алуды қамтамасыз ету үшін айына 500 мың тоннадан жоғары деңгейде белгіленді.

Сондай-ақ Әлихан Смайылов АӨК субсидиялау жүйесін реформалау тақырыбын қозғады.

«Біз барлық бюджет шығыстарын олардың тиімділігін арттыру бөлігінде, оның ішінде ауыл шаруашылығы саласы бойынша қайта қарап жатырмыз. Қаржыны ауыл шаруашылығы тауар өндірушілерін ынталандыруға бағыттағымыз келеді. Бұл инвестициялық субсидиялар, несиелер бойынша пайыздық мөлшерлемені арзандату, оларды одан да қолжетімді еткіміз келеді. Ауыл шаруашылығын қаржыландыруды қысқартқымыз жоқ. Керісінше, оны ұлғайтқымыз келеді. Алайда одан экономика үшін, жалпы ел үшін пайда болуы керек, әрбір бюджеттік теңгенің қайтарымын арттырғымыз келеді», — деді Премьер-Министр.

Отырысты қорытындылай келе, Әлихан Смайылов барлық қатысушыларға айтылған ескертулер мен ұсыныстар үшін алғыс айтты.

«Біз бірлесіп алға жылжуымыз керек. Қандай да бір сындарлы ұсыныстар болса, оларға әрқашан құлақ асып, өз жұмысымызда ескеретін боламыз. Барлық жоспарланған өзгерістерді жүзеге асыруда бизнеске жетекші рөл берілетінін тағы да растағым келеді. Үкімет кәсіпкерлік қоғамдастығымен бірлесіп, бизнесті жүргізу жағдайын жақсартуды және еліміздің экономикасының өсуі мен дамуы, азаматтардың әл-ауқатын арттыру үшін алғышарттар жасауды жалғастырады», — деп түйіндеді Премьер-Министр.

Еске салайық, Президент Қасым-Жомарт Тоқаев Ауыл шаруашылығы министрі Ербол Қарашөкеевке сөгіс жариялаған болатын.





Jańalyqtar

Үрдіс

MURAǴAT