Қарағанды облысында ішімдік жасауға арналған жасырын цех анықталды

НҰР-СҰЛТАН. ҚазАқпарат – ҚР Қаржылық мониторинг агенттігінің Қарағанды облысы бойынша аумақтық департаменті контрафактілік алкоголь өнімін дайындау және өткізу фактісінің жолын кесті, деп хабарлайды ҚазАқпарат департаменттің баспасөз қызметіне сілтеме жасап.

Баспасөз қызметінің мәліметтеріне қарағанда, жасырын тергеу әрекеттерінің нәтижесінде Қарағанды ​​облысының Саран қаласында жалға алынған қоймада суррогат алкоголь өнімін өндіретін астыртын цех ұйымдастырылғаны анықталды. Аталған цех өнімдері Қарағанды ​​облысының базарлары мен дүкендеріне өткізілетін болған.

Тінту кезінде жалпы көлемі 10 мың литрге жуық 4 мың дана суррогат спиртінің пластикалық бөтелкелері, 500 литр көлеміндегі 100 дана пластикалық ыдыстар, жалпы көлемі шамамен 12 мың литр 20 мыңнан астам дана әр түрлі шарап және арақ өнімдері тәркіленді.

«Аталған факті бойынша Қылмыстық кодекстің 214-бабының 1-бөлігі бойынша сотқа дейінгі тергеп-тексеру жұмыстары басталып, өндірілген және өткізілген өнімнің барлық көлемін анықтау бойынша жедел-іздестіру шаралары жүргізіліп жатыр»,-деп хабарлайды ҚазАқпарат.