22:58, 07 Маусым 2018 | GMT +6
Қарағанды облысында «Гүлшат» күн электр стансысының құрылысы басталды
ҚАРАҒАНДЫ. ҚазАқпарат - Қарағанды облысында Балқаш қаласы Гүлшат кентінің маңында қуаттылығы 40 МВт болатын күн электр стансысы бой көтереді. Оның құрылысы бүгін, 7 маусымда басталды, деп хабарлайды ҚазАқпарат облыстық ішкі саясат басқармасына сілтеме жасап.
Жобаның іске қосу салтанатына Қарағанды облысы әкімінің орынбасары Анатолий Шкарупа, Балқаш қаласының әкімі Александр Аглиулин, инвестор - RisenEnergy испандық компаниясының өкілдері қатысты.
Инвестицияның жалпы сомасы 46 млн АҚШ долларын құрайды. Жобаға «КПМ-Дельта» ЖШС бастамашылық етуде.
«Гүлшат» күн электр стансысын 2019 жылдың бірінші тоқсанында пайдалануға беру жоспарланып отыр. Ол жылына 59 млн кВт/сағатқа дейін «таза» электр энергиясын өндіреді. Ол Қарағанды облысындағы және Қазақстандағы ең ірі жаңартылатын энергия көзі нысандарының бірі болмақ.
Күн электр стансысының құрылысына 300-ден астам жұмысшы тартылады. Ол іске қосылғаннан кейін 10 маман қызмет көрсетеді.