Қарағанды облысында бейресми жұмыспен қамтылғандар медсақтандыру қорына 16 млн теңге аударды
Бірыңғай жиынтық төлем – бейресми жұмыспен қамтылған азаматтар үшін бірден бірнеше жүйеге қатысудың оңайлатылған тәсілі. Ол БЖТ жалпы тіркелген сомасынан міндетті аударымдардың төрт түрін қамтиды (қала тұрғындары үшін 1 АЕК - 2651 теңге және ауыл тұрғындары үшін 0,5 АЕК – 1326):
10% -жеке табыс салығына (ЖТС), 20% - мемлекеттік әлеуметтік сақтандыру қорына, 30% - БЖЗҚ-дағы зейнетақы төлемдеріне, 40% - міндетті әлеуметтік-медициналық сақтандыру қорына аударымдар.
«Өз бетінше жұмыспен айналысушылар үшін бұл ыңғайлы төлем, себебі зейнетақы өтілі, әлеуметтік жүйеге қатысуы есепке алынады және де салық органдарында ресми есепте тұрғаны көрінеді. Сондай-ақ, БЖТ тұрақты төлеу кезінде азаматтар «сақтандырылған» мәртебесіне ие болады және тегін медициналық көмектің кепілдендірілген көлеміне ғана емес, сонымен қатар кеңестік-диагностикалық қызметтер мен жоғары технологиялық операциялар кіретін МӘМС пакетіне де тегін қол жеткізеді», - деп толықтырды медициналық сақтандыру қорының Қарағанды филиалының бөлім басшысы Светлана Щеткина.
Естеріңізге сала кетейік, БЖТ Қазақстанда 2019 жылдың 1 қаңтарынан бастап жұмыс істейді. Осы уақыттан бастап аймақтың 6,5 мыңнан астам тұрғыны төлем жасаған.