Қарағанды облысында 84 жастағы ақсақал трактормен ауыл жолдарын қардан тазартуда
Минниагзам Авлияров Башқұртстанда дүниеге келген және жас кезінде Қазақстанға тың жерлерді игеруге келген. Тікенекті ауылында тұрып, ұзақ жылдар механизатор болып жұмыс істеген. Комбайн, трактор және басқа да арнайы техниканы тізгіндеп, елге қызмет көрсеткен. Мұнда ол үйленіп, жұбайымен бірге бес бала – үш қыз бен екі ұл тәрбиелеп өсірді. Ауыл тұрғындары ақсақалды Ағзам аға деп атап кеткен. Зейнеткер өмір бойы қыс түскенде ауылдың қарын күреп, көктемде бөгеттерді нығайтумен айналысып келеді.
Зейнетке шыққаннан кейін де Ағзам аға қол қусырып отыра алмаған. Халық арасында белсенді азаматтық ұстанымы үшін оған «күміс волонтер» және «супермен» деген лақап ат берілген.
«Қазақстанға 1958 жылы, 19 жасымда тың жерлерді игеруге келдім. 1961 жылы мені осында жіберді. Ол кезде мына жерлер қу дала болатын, мен совхоз құрылысына қатыстым. Содан бері осында тұрамын. Тікенекті – бұл менің Отаным. Ауылдастарыма шын жүректен көмектесемін. Алла Тағала маған күш-қуат бергендіктен, адамдарға көмектесуім керек деп санаймын. Сонымен қатар қазір біздің ауылда көбіне қарттар ғана қалды. Ауылымызды қар басып кеткенде, оларға жүріп-тұру қиынға соғады», – дейді ақсақал.
Ауыл әкімі Ерлан Оспанов Ағзам ата осындай азаматтық ұстанымымен жастарға үлгі көрсетіп отыр деп санайды.
«Ағзам ағаны бәріміз құрметтейміз. Ол кісі жергілікті халыққа қырық жыл бойы көмектесіп келеді. Оның шағын шаруа қожалығы бар. Қыста қар күрейді, жазда жергілікті тұрғындарға шөп жинауға көмектеседі. Биыл қоныс аудару бағдарламасы бойынша Павлодар облысынан осында көшіріп әкелеміз деп отырған отбасыға көмек көрсетуге дайын. Ол көпбалалы отбасы, оларға шаруа қожалықтарының басқа басшылары да көмек көрсетеді. Ал ақсақалға зор денсаулық тілейміз. Дәл осындай адамдар біздің жастарымызға үлгі болуы керек», – дейді Ерлан Оспанов.
Тікенекті ауылында бүгінгі таңда 226 адам тұрады. Елді мекен аудан орталығынан 320 шақырым және Қарағандыдан 550 шақырым жерде орналасқан.
