Қарағанды облысында 12 адам тамақ жеп уланған дөнер дүңгіршегі жабылды
Қарағанды облысы бойынша Қоғамдық денсаулық сақтау департаментінің ақпаратынша, дөнер дүңгіршегін жоспардан тыс тексеру жұмыстарының қорытындылары бойынша, бірқатар заң бұзушылықтар анықталған: дүңгіршекте ыстық су, дезинфекциялық құралдар, өндірістік бақылаудың бекітілген бағдарламасы болған жоқ, шикізат пен дайын өнімді сақтау кезінде «тауарлық көршілестік» ережелері сақталмаған, сапасын растайтын құжаттары жоқ тағамдық өнім қолданылған, сондай-ақ қызметкерлері медициналық тексеруден уақтылы өтпеген.
Зертханалық зерттеулер бойынша, дүңгіршекте патогендік микрофлора (1-Salmonella interitidis, 3 - Рroteus mirabilis) анықталды, бұл онда санитарлық нормалардың сақталмағанын білдіреді.
Ведомствода атап өткендей, медициналық тексеруден мерзімінде өтпеген бір қызметкерді уақытша жұмыстан шеттету туралы және нысанда санитарлық-эпидемияға қарсы шараларды өткізу туралы қаулы шығарылған. 24 қазан күні жеке кәсіпкер дөнер дүңгіршегінің қызметін тоқтатты.
Бұдан басқа, ағымдағы жылдың 1 қарашасында Абай ауданы Қоғамдық денсаулық сақтау басқармасы Қарағанды облысының Мамандандырылған ауданаралық экономикалық сотына дөнерхананың қызметін тоқтату туралы арыз шағым жіберді.
Еске сала кетейік, 22-24 қазан күндері аралығында Қарағанды облысының Абай қаласында 12 адам медициналық көмекке жүгінген, соның ішінде 8 адам (арасында бір бала) ауруханаға жатқызылды. Оларға «өткір ішек инфекциясы» диагнозы қойылды. Медициналық көмек сұрап келген барлық қалалық азаматтардың жергілікті дөнерханадан тамақтанғаны анықталды. Аталған факті бойынша қылмыстық іс қозғалды.