«Қарағанды-Балқаш» тас жолының құрылысы биыл басталады

АЛМАТЫ. ҚазАқпарат - «Қарағанды-Балқаш» тас жолының құрылысы биыл тамызда басталуы мүмкін, деп хабарлайды ҚазАқпарат тілшісі.

«Жобалық сметалық құжаттама дайын. Үш мердігер анықталды. Ұзындығы шамамен 367 км болатын жол учаскесі 2020 жылдың күзіне дейін пайдалануға беріледі деп жоспарланып отыр», - деді «ҚазАвтоЖол» ұлттық компаниясының баспасөз хатшысы Бауыржан Серікбаев.

Оның айтуынша, жол салуға қаражат Қытай экспорт-импорт банкінен алынбақ.

Ұлттық компания өкілдері осы жол пайдалануға берілсе Орталық-оңтүстік арасындағы жол байланысының мәселесі шешілетініне үмітті.

«Қарағанды-Балқаш» жолы республикалық маңызы бар Екатеринбург-Алматы тас жолының бір бөлігі.

Бұл жол Қостанай, Астана, Қарағанды  қалалары арқылы өтеді.