Қара сөмкемен есірткі тарату әсіресе жастар арасында тиімді бизнеске айналды – Ерболат Досаев

АЛМАТЫ. ҚазАқпарат- Алматыда есірткінің таралуына қарсы күрес шаралары күшейтіліп жатыр. Бұл туралы қала әкімі Ерболат Досаев Түрксіб ауданы тұрғындарымен кездесуінде айтты, деп хабарлайды ҚазАқпарат тілшісі.

Кездесу барысындаТүрксіб ауданының тұрғыны есірткі жарнамасына қатысты мәселе көтерді.

«Біздің ауданда есірткі жарнамасына сілтеме қойылатын көптеген орын бар. Шара қолдануды сұраймын, мүмкін осы жарнамамен және есірткі сатумен айналысатындарды бақылау және жазалау үшін видеобақылау орнату керек шығар»,- деді аудан тұрғыны.

Алматы әкімі Ерболат Досаев есірткі мен нашақорлықтың әсіресе жастар арасында кең тарағанын, бұл - күн тәртібіндегі өзекті мәселенің бірі екенін атап өтті.

«Бүгінде, өкінішке қарай, бұл жастар үшін тиімді бизнеске айналды. Жарнама арқылы қара сөмкелерді жеткізумен айналысады. Біз оларды ұстаймыз, әкімшілік айыппұл саламыз. Бұл Түрксіб ауданының ғана емес, қала бойынша өзекті мәселе болып тұр. Аудан әкімдерімен және қалалық полиция департаментімен бірлесіп қазір үлкен жұмыс атқардық. Сонымен қатар бізге көмектесетін түрлі ұйымдарды тарта отырып, «Наркостоп» бағдарламасы көрсетілді. Үкіметтік емес ұйымдар осы жарнамаларды жоюға көмектеседі»,-деді Алматы әкімі.

Сонымен қатар, ол есірткі тасымалдаушылар орындарын үнемі өзгертіп отыратынын тілге тиек етті.

«Сондықтан аудан әкіміне тапсырма беремін. Қосымша 585 камера орнатылады», – деді қала әкімі.