Қаңтар оқиғасында адамды демонстрациялық түрде ұру, өлтіру қолданылған
«Сол күндері Алматы, Шымкент қалаларында, Ақтөбе, Атырау, Алматы, Жамбыл, Қызылорда және Шығыс Қазақстан облыстарында қылмыскерлер қаруды қолдану арқылы мақсатты түрде стратегиялық мемлекеттік және азаматтық нысандарды басып алып, қиратқан. Оның ішінде – әкімдіктер, әуежайлар, полиция ғимараттары, Ұлттық қауіпсіздік комитетінің департаменті, телевидение және байланыс, сондай-ақ сауда үйлері, қару дүкендері және азаматтардың мүліктері бар», - деді ол Орталық коммуникациялар қызметіндегі брифинг барысында.
Е.Қилымжановтың атап өтуінше, қаңтар оқиғасы кезінде демонстрациялық ұрып-соғулар, тонаулар және адам өлтіру кеңінен қолданылды. Бұл әрекеттердің мақсаты көшелерде үрей туғызу, қылмыскерлердің жолында болған адамдарды қорқыту, жалған ақпарат тарату арқылы елдегі жағдайдың тұрақсыздануына қол жеткізу болды.
«Қиратуға қатысушылар полиция қызметкерлеріне, әскерилерге және қарапайым адамдарға шабуыл жасады. Жолдардың жүру бөлігін жауып тастап, көлік құралдарын өртеді. Азаматтарды қорқыту арқылы жаппай тәртіпсіздіктерге қатысуға шақырды, тонаулар, ұрлық және зорлық-зомбылық жасады. Қылмыскерлер қару дүкендерін тонады, ұрланған қарудың көмегімен бейнежазба камераларын жойды. Салдарынан 100 млрд теңгеден астам сомаға залал келтірілді, оның ішінде бизнес субьектілеріне - 92 млрд теңге. Жүздеген ғимарат пен көлік құралдары өртенді. Жаппай тәртіпсіздіктерді ұйымдастырудағы қылмыстық әрекеттер адам өліміне әкеп соқты», - деді Елдос Қилымжанов.