Қаңтар оқиғасы: ШҚО-да 700-ден астам бейнежазба тексерілуде
ШҚО прокуратурасы баспасөз қызметінің мәліметіне сүйенсек, прокуратура басшылығы қаңтар оқиғасына қатысқаны үшін ұсталған адамдардың мүдделерін қорғайтын адвокаттармен кездесу өткізді.
«Бүгінде Өскемен және Семей қалаларындағы ведомствоаралық жедел-тергеу топтарының құқыққа қарсы іс-әрекет фактілері бойынша арнайы прокурорлардың басшылығымен 12 қылмыстық іс (жаппай тәртіпсіздіктерге қатысу, билік өкілдеріне қатысты күш қолдану, оқ-дәрілерді, есірткі құралдарын заңсыз сақтау, арнайы техниканы айдап әкету, терроризм актілері бойынша) тергелуде. Аталған қылмыстарды жасады деген күдікпен 130 азамат ұсталды. Сот барлығына қатысты қамауға алу санкциясын шығарды», - делінген ақпаратта.
Қамауға алынған 30 адамның, оның ішінде 1 кәмелетке толмаған және 5 әйелдің денсаулық жағдайын, асырауында кішкентай балаларының болуын және басқа да жеңілдететін мән-жайларды ескеріп, сот және прокурор бұлтартпау шарасын үйқамаққа алуға ауыстырды.
«Адвокаттармен кездесуде қылмыстық істерді тергеудің алдын ала нәтижелері айтылды. Тергеу топтары оқиға орындарында 170-тен астам тексеру және тінту жұмыстарын жүргізді. «Сергек» камералары, Жедел басқару орталықтарынан және ұялы телефондардан 700-ден астам бейнежазба алынып, тексерілуде. 634 сот-медициналық, тауартану, өрт-техникалық, құрылыс, баллистикалық, трассологиялық және басқа да сараптамалар тағайындалды», - делінген хабарламада.