Қаңтар қасіретінің себебі мен салдарын терең талдауымыз керек – Тоқаев

НҰР-СҰЛТАН. ҚазАқпарат – «Nur Otan» партиясының кезектен тыс ХХІ съезінде ҚР Президенті Қасым-Жомарт Тоқаев қаңтар қасіретінен сабақ алудың маңыздылығына тоқталды, деп хабарлайды ҚазАқпаат тілшісі.

«Қаңтардың алғашқы күндерінде Қазақстан салмақты сілкіністі бастан өткерді. Біз конституциялық тәртіпті, мемлекет негіздерін, елдің тұтастығын, халық бірлігін бұзуға және сайып келгенде, билікті басып алуға бағытталған, мұқият жоспарланған шабуылға тап болдық», -деді Мемлекет басшысы.

Президенттің айтуынша, ел азаматтарының ұйымшылдығының, ынтымағының, батылдығының, саналылығының арқасында мемлекеттің күйреуін болдырмай, қазіргіден де көп қантөгіске жол берілмеген.

«Қасіретті қаңтар» біз үшін Тәуелсіздік жылдарындағы ең ауыр сынақ болды. Біз қоғамның кемелдігі мен мемлекеттің ауқаттылығы сынағын сәтті тапсырдық. Бірақ біз осы оқиғалардың бүкіл себептері мен салдарын терең талдауымыз керек. Бастан кешкен трагедиядан қажетті сабақтардың бәрін алуымыз керек», - деді Президент.

Айта кетейік, «Қасым-Жомарт Тоқаев «Nur Otan» партиясының Төрағасы болып сайланды.