Қаңғыбастар үшін не маңызды тамақ па, әлде шарап па - әлеуметтік эксперимент

СЕМЕЙ. ҚазАқпарат - Өскемендіктер тұрақты мекенжайы жоқ тұрғындар арасында әлеуметтік сараптама жүргізді. Олар көше кезген панасыздарға шарап пен тамақ ұсынып, қайсысын таңдайтынын анықтады, деп хабарлайды ҚазАқпарат.

Екі жас дүкеннен азық-түлік пен шарап сатып алып, көшеге шыққан. Осылайша панасыз, көшеде жүргендерге таңдау жасауды өтінген. Жастар өздерінің эксперименттерін бейнежазбаға түсірген.

«Мен қазір сізге азық-түлік толған пакет немесе бір шөлмек шарап ұсынамын. Сіз қайсысын аласыз?», - деді жігіт.

«Мен шарапты таңдаймын», - деп жауап берді азамат.

Әлеуметтік желіге салынған бейнеролик көпшілік арасында әртүрлі пікір тудырды.

«Бұл тәжірибе үйсіз-күйсіз жүргендерді ішімдікке өзіміз ынталандыратынымызды көрсететін сияқты. Сонымен, біз оларға көмектесіп жүрміз бе, жоқ керісінше, зиянымыз тиіп жатыр ма? Мен екіншісін дұрыс деп есептеймін», - деп жазды желі қолданушыларының бірі.

«Тағы бір дәлел, олардың ақшаны шынымен де қайда жұмсайтыны белгілі болды. Бір өкініштісі, олардың арасында тамақтанғысы келетіндер де бар», - деп жазды келесі оқырман.

Айта кету керек, жүргізілген тәжірибеде тұрақты жері жоқ 10 адамның тек біреуі ғана тамақты таңдады.