Кандидаттардың салық мәліметтеріндегі қайшылықтар неге сайлау күні жақындаған кезде ғана анықталып жатыр
«Кандидаттардың салық декларациясындағы сәйкессіздіктерді тіркеу кезінде анықтап, ескертуге не кедергі? Неліктен кандидат тіркеуден өтіп, үгіт-насихат кезеңіне жіберілгеннен кейін ғана салық деректері тексеріліп, үміткерліктен шығарылады?», - деп сұрады БАҚ өкілі Орталық сайлау комиссиясының мүшелерінен.
Асылбек Смағұловтың айтуынша, қазір қоғам тарапынан осы мәндес сұрақтар жиі түсіп жатқан көрінеді.
«Біреу біледі, біреу білмейді, біздің айтарымыз мынау: Бізге келіп түсетін, округтік сайлау комиссиясынан келетін мәлімет – тек анықтама. Біз сол анықтама бойынша шешім қабылдаймыз. Әрі қарай олар берген мәліметтің толықтығын, дұрыстығын тексеретін – салық органдары. Яғни салық органдары ол жерде азаматтар деректерін дұрыс көрсетпесе, дұрыс емес екені туралы мәлімет береді», - деді ОСК мүшесі.
Оның айтуынша, бұл мәселе Сайлау туралы Конституциялық заңның 89-бабымен реттеледі.
«Яғни ол біздегі Сайлау туралы Конституциялық заңның 89-бабы бойынша кандидаттардың өздерінің деректерін дұрыс бермеуі немесе қателесуі, тағы басқалары ол кісіні тіркеуден қайтадан алып тастауға құқық береді. Сондықтан біз анықтамадан басқа ештеңе көре алмаймыз», - деді Асылбек Смағұлов.
Сондай-ақ, ОСК аталмыш телевизиялық пікірсайысқа қатысушылардың тізімін мақұлдады.