Қамшыбек Қоңқабаевтың келесі жекпе-жегі қашан өтетіні анықталды

НҰР-СҰЛТАН. ҚазАқпарат – Қазақстанның бокстан ұлттық құрамасының бас бапкері Қайрат Сәтжанов LifeSport KZ YouТube-арнасына берген сұхбатында Қамшыбек Қоңқабаевтың командаға жақын арада оралатыны туралы айтты. Бұл туралы ҚазАқпарат әлеуметтік желідегі «Қазақстанның кәсіпқой боксы» парақшасына сілтеме жасап хабарлайды.

«Қамшыбек 6 немесе 2 шілдеде жекпе-жекке шығады (кәсіпқой бокста), кейін ұлттық құрамаға қосылып, Азия ойындары аяқталғанша осында болады», - деді Сәтжанов.

Қамшыбек Қоңқабаев (5-0, 4КО) кәсіби рингтегі осыған дейінгі жекпе-жегін ақпан айында өткізді: ол өзбекстандық Фаррух Джураевті екінші раундта нокаутқа түсірді.

Қоңқабаев кәсіпқой боксқа алғашқы қадамын 2020 жылы жасады. Бірақ әуесқой бокстан әлі алыстаған жоқ.