Қамшыбек Қоңқабаев профидегі екінші жеңісінен кейін әлемдік рейтингіде көтерілді

НҰР-СҰЛТАН. ҚазАқпарат – Қазақстандық боксшы Қамшыбек Қоңқабаев (2-0, 2 КО) кәсіпқой рингтегі екінші жеңісінен кейін Boxrec.com порталында рейтингін жақсартты, деп хабарлайды ҚазАқпарат Sports.kz сайтына сілтеме жасап.

Қоңқабаев бірінші ауыр салмақ рейтингінде 74-ші орыннан 51-ге көтерілді.

Кеше Қамшыбек Украина боксшысы Сергей Радченконы (7-7, 2 КО) төртінші раундта нокаутқа жіберген болатын.

Еске сала кетейік, Қамшыбек Қоңқабаевтың кәсіпқой рингтегі алғашқы жекпе-жегі биылғы тамыз айында қазақстандық Иса Ақбербаевқа (20-2, 15 КО) қарсы өткен еді. Ол Исаны нокаутқа түсіріп, жеңіске жетті.

Қоңқабаевтың әуесқойлар боксындағы айқастарына келсек, ол Қазақстан құрамасының капитаны болып, әлем және Азия чемпионаттарында екі рет күміс жүлде алған.