Калифорниядағы орман өрті 404 құрылыс нысанын зақымдады

НҰР-СҰЛТАН. ҚазАқпарат – Американың Калифорния штатында болған «Дикси» өртінің жалыны төрт округтің мыңдаған шақырымына тарады, деп хабарлайды ҚазАқпарат San Francisco Chronicle-ға сілтеме жасап.

Штаттағы Плумас, Бьют, Техама және Лассен округтерінде өршіп тұрған орман өрті 404 құрылыс нысанын, соның ішінде тарихи Гринвилл қаласындағы 27 құрылысты зақымдаған. Жалынды сөндіруге 5 мыңнан астам өрт сөндіруші жұмылдырылды.

Сенбі күні Калифорния штатының губернаторы Гэвин Ньюсом кезінде Гринвилл қаласына барып, Twitter-де көзімен көрген жағдай туралы жазды.

Басылым мәліметінше, «Дикси» өрті 13 шілдеде басталды. Оның орын алуына электр тасымалдау желілеріне ағаштың құлауы себеп болуы мүмкін.