Қ.Сәтбаев атындағы ҚазҰТЗУ студентін пышақтады деген күдікпен алматылық қамауға алынды

АЛМАТЫ. ҚазАқпарат - Курстасын пышақтады деген күдікпен 23 жастағы алматылық қамауға алынды. Аудандық сот күдіктіні 2 айға қамау туралы шешім шығарды.

«Қ.Сәтбаев атындағы ҚазҰТЗУ студенті Тілек Текешов өзінің курстасы Самұрат Жақсылықовты ажал құштырды деген күдікпен ұсталған болатын. Бостандық аудандық соты оны бұлтартпау шарасы ретінде 2 айға қамауға алу туралы шешім шығарды», - деді қалалық соттың баспасөз хатшысы Бауыржан Ахметов. Айта кетейік, оқыс оқиға 30 қарашада орын алған еді. Университет кітапханасына компьютерге таласқан екі жас жігіт мәселені шешуге жеке шыққан кезде олардың бірі екіншісіне пышақ сілтеген. Алған жарақатынан Самұрат Жақсылықов сол жерде көз жұмған.