Изолятор мен тергеу бөлмелеріне видеокамералар орнатылады - ІІМ
«Бүгінде жергілікті полиция қызметін сервистік модель қағидаттарына ауыстыра отырып, реформалау бойынша тәсілдер әзірленді. Мемлекет басшысы пенитенциарлық мекемелерде және полицияның қызметтік ғимараттарында, құқық қорғау органдарының барлық жедел-тергеу бөлімшелерінде жаппай бейнебақылауды енгізуді тапсырды.
Бұл полицияға халық алдында ашық жұмыс істеуге мүмкіндік беріп, сыбайлас жемқорлық тәуекелдерін азайтады», - деді Нұрділдә Ораз.
Оның сөзіне қарағанда, Батыс Қазақстан облысында аталған бейне жүйелерді монтаждау және орнату жұмыстары толық аяқталған.
«Полиция департаментінің 26 әкімшілік ғимаратында халықпен жұмыс жүргізілетін үй-жайларда 254 видеокамералар орнатылған.
Полиция департаментінің өзінде 22 бейнекамера, көші-қон қызметінде 2 камера орнатылды. Орал қаласының полиция басқармасында қызметкерлердің жұмысын 39 камера, Абай қалалық полиция бөлімінде 17 камера, Зачаганск бөлімінде – 6 камера бақылайды.
Бейнемониторинг жүйесімен уақытша ұстау изоляторлары, облыс орталығының 24 учаскелік полиция пункттері қамтылған. 19 аудандық полиция бөлімшесінде 119 камера орнатылды.
Полицияның қызметтік кеңістіктерін, сондай-ақ барлық жедел-тергеу бөлімшелерін бейнекамералармен жарақтандыру ағымдағы жылы бүкіл ел бойынша қалалық, аудандық және кенттік полиция бөлімдерін ескере отырып аяқталады», - деді министрліктің ресми өкілі.