IWF Олимпиадан кейін Қазақстанның ауыр атлеттерін бір жылға жарысқа қатысу құқығынан айырады

АСТАНА. ҚазАқпарат - Халықаралық ауыр атлетика федерациясы (IWF) Рио-де-Жанейродағы Олимпиада аяқталғаннан кейін Ресей, Қазақстан, Беларусь ауыр атлетика федерациясын бір жылға жарысқа қатысу құқығынан айырады, IWF басшысы Тамаш Аян осылай мәлімдеді. Бұл туралы ресейлік РИА Новости агенттігі хабарлады.

«Риодағы Олимпиададан кейін бірқатар елдердің мүшелігін тоқтатамыз. Оған кепілдік беремін. Олар Ресей, Қазақстан, Беларусь, - деп мәлім етті IWF басшысы. - Қайта талдау аяқталған жоқ, ақпарат күтіп отырмын, тағы бірнеше ел жарыстан шеттетілуі мүмкін. Оны қыркүйектің аяғында немесе қазанда мәлімдейміз».
IWF  атқарушы комитеті 22 маусымда спортшылары  допинг қолданған елдер федерациясын қайта тексергеннен кейін 2008 және 2012 жылғы олимпиадаларда үш немесе одан көп допинг сынама оң көрсеткіш берген жағдайда, бір  жылға жарысқа қатысу құқығынан айыратын қаулы қабылдады. Оған Ресей, Қазақстан, Беларусь ілігуі ықтимал.