Италияда нөсер жауынның соңы су тасқынына ұласты

АСТАНА. ҚазАқпарат – Италияның басым бөлігінде жауған нөсер жаңбыр Чезена қаласы арқылы ағып өтетін Савио өзенінің арнасынан шығуына әкеп соқты. Елдімекендер мен даланы Савио мен Италияның солтүстігіндегі басқа да өзендердің суы басып қалып, көшкін жүрді. Көп адам үйдің шатырына шығып, көмек күтіп отыр, деп хабарлайды ҚазАқпарат Euronews агенттігіне сілтеме жасап.

Венеция билігі су тасқынын тоқтату үшін лагунадағы мобильді бөгетті іске қосуға дайындалып жатыр. Өзен жанында тұратын адамдарға суды қызықтаймын деп төменгі қабаттарда қалып қоймауды ескертті.

«Ақылға келіңіздер, апат трагедияға айналып кетпес үшін су көремін деп жеке қауіпсіздігіңізді ұмытып кетпеңіз», - деді Чезена мэрі Энцо Латтука теледидар арқылы сөйлеген сөзінде.

Италияның солтүстік-шығысындағы Равенна туристік қаласының билігі де халықты ғимараттың жоғарғы қабатына шығуға шақырды.

Адриат теңізі жағасындағы Риччон қаласының мэрі де судан жүзіп өту үшін қайық және басқа құралдарды пайдаланбауға шақырды.

Елдегі нөсер жауын мен жел жақын күндері тоқтамайды.

Эмилии-Романьеде жоғары қауіп дәрежесі (қызыл) енгізілді. Жауын салдарынан пойыздардың қозғалысы тоқтап, мектептер жабылды.