Италияда қазақ қызын көлік қағып, мерт қылды

АСТАНА. ҚазАқпарат – Италияның Салерно қаласында 27 жастағы Әсем Жарбосынды көлік қағып, мерт қылды. Бұл ақпаратты еліміздің Сыртқы істер министрлігі ресми растады, деп хабарлайды ҚазАқпарат тілшісі.

«Қайғылы оқиғаны растаймыз. Қазір мүрдесін Қазақстанға жеткізу үшін жұмыс жүргізіліп жатыр. Туыстарымен байланыстамыз», - деді Сыртқы істер министрлігінің ресми өкілі Айбек Смадияров.

Айта кетейік, бүгін еліміздің бұқаралық ақпарат құралдарында 27 жастағы Әсем Жарбосынның Италияда қаза тапқандығы жарияланған еді.

Аталған елдің жергілікті БАҚ таратқан мәліметіне сәйкес, қайғылы оқиға Салерно қаласында орын алған. 17 қаңтар күні Peugeo көлігін басқарған 20 жастағы жүргізуші Джузеппе Верди опера театры маңындағы жаяу жүргіншілер жолында студент қызды қағып кеткен.

БАҚ мәліметтеріне қарағанда, қазақ қызын қаққан жүргізуші оған алғашқы көмек көрсетуге тырысқан, жедел жәрдем шақырған. Алайда, өкінішке орай оны құтқару мүмкін болмады.

Фото: ilmessaggero.it