Италия СІМ орынбасары Қазақстанға сапармен келеді
«13-14 қарашада Италия Республикасы Сыртқы істер министрінің орынбасары Манлио Ди Стефано Қазақстанға сапармен келеді. Сапар барысында ҚР Сыртқы істер министрі Мұхтар Тілеубердімен және Цифрлық даму және аэроғарыш өнеркәсібі, Қаржы, Ауыл шаруашылығы, Экология, геология және табиғи ресурстар министрліктерінің басшыларымен кездесулер жоспарлануда», - деді Айбек Смадияров.
Оның дерегінше, келіссөздер барысында тараптар саяси өзара іс-қимыл, сауда-инвестициялық ынтымақтастық, қоршаған ортаны қорғау, ауыл шаруашылығы, цифрландыру және басқа да мәселелері бойынша екіжақты ынтымақтастықтың жай-күйі мен перспективаларын талқылайды.
«Сондай-ақ, Манлио Ди Стефаноның «Самұрық-Қазына» ҰӘҚ АҚ қолдауымен Италияның Қазақстандағы елшілігі ұйымдастырған Қазақстан-Италия бизнес-форумына қатысуы қарастырылған», - деді ол.