ІТ-менеджерлер қауымдастығы: Клиенттердің 85 пайызы «Қазақтелеком» сервистерін таныстарына ұсынбайды

None
Фото: Қазақстан ІТ-менеджерлер қауымдастығы
АСТАНА. ҚазАқпарат – Қазақстан ІТ-менеджерлер қауымдастығының басқарма төрағасы Асқар Бишигаев «Қазақтелеком» компаниясының 2022 жылғы жұмысы талқыланған қоғамдық кеңес отырысында «Клиенттердің қанағаттану индексі» дейтін көрсеткіш енгізуді ұсынды, деп хабарлайды ҚазАқпарат тілшісі.

«В2В» сегментінде де, «B2C» сегментінде де тұтынушылардың «Қазақтелеком» сервистеріне қанағаттану деңгейі көптеген сұрақ туындатады. NPS (тұтынушылардың адалдық индексі – ред) 7 пайыздан 15 пайзыға дейін көтерілгенін алға ілгерілеу деп айтуға болатын шығар. Бірақ бұл көрсеткіш 30 пайызға жеткенде ғана жақсы деңгей болып салынатынын бәріміз түсініп отырмыз. Одан төменгі көрсеткіштің бәрі аса жақсы емес», - деді қауымдастық басшысы.

Сондай-ақ, ол «Қазақтелеком» клиенттері қызмет сапасына көңілі толғандықтан емес, басқа балама жол болмағандықтан ұлттық компания ұсынатын қызметтерден бас тарта алмай отырғанын айтты.


«Бұл (тұтынушылардың адалдық индексі 15 пайызға жеткені – ред.) мынандай ахуалдан хабар береді. «Қазақтелеком» сервисін қолданатын 100 адамның ішінде 85-і өзі тұтынып жүрген сервисті өзінің туыстарына, жақын достарына ұсынбайды деген сөз. Сонда 15 адам ғана ұсынады деген сөз. Шын мәнінде «Қазақтелеком» монополиялық ұйым екені түсінікті. Сондықтан қандай да бір балама жоқ. Егер балама жол қандай да бір бәсекелестік жағдайында пайда болса, «Қазақтелекомның сервис сапасына көңілі толмайтын клиенттер басқа ұйымдарға ауыса бастар еді деп ойлаймын. Сондықтан, менің көзқарасым бойынша, клиенттердің қанағаттану индикаторы деген халықаралық көрсеткішті енгізуге болады. Сол көрсеткішті дұрыс есептеп үйренсек, клиенттердің, сіздердің абоненттеріңіздің көңілін табуға елеулі қадам жасаған болар едік», - деді Асқар Бишигаев.


Соңғы жаңалықтар