Ислам ынтымақтастығы ойындарында Арли Чонтей чемпион атанды

НҰР-СҰЛТАН. ҚазАқпарат - Түркияның Конья қаласында өтіп жатқан Ислам ынтымақтастығы ойындарында қазақстандық ауыр атлет Арли Чонтей чемпион атанды, деп хабарлайды ҚазАқпарат тілшісі.

Дүбірлі додада 55 келіге дейінгі салмақта сынға түскен ол қоссайыс нәтижесінде 253 (114+139) келіні бағындырды.

Аталған салмақта Сауд Арабиясынан келген Мансур Алсалим 252 (115+137) келі көрсеткішпен екінші орын алса. индонезиялық Ади Нугрохо қоссайыста 244 (110+134) келі нәтижемен үздік үштікке ілікті.

Ислам ынтымақтастығы ойындары 2005 жылдан бері тұрақты өткізіліп келеді. Биыл бесінші мәрте жалауын желбіретті.

Биылғы додаға 55 елден спортшылар келді. Ойындар 8 тамызда басталды. Ол 18 тамызда мәресіне жетеді.

Қазірге дейін қазақстандық спортшылар 16 медальмен (7 алтын, 1 күміс, 8 қола) жалпыкомандалық есепте үшінші орында келеді. Көш басында – Түркия және Иран спортшылары.

Еске салсақ, бұдан бұрын Ислам ынтымақтастығы ойындарында жеңіл атлет Михаил Ливтин алтын медаль алды.

Сондай-ақ Жансел Дениз үшінші орынға тұрақтады.

Фото: olympic.kz