15:12, 24 Ақпан 2020 | GMT +6
Иранда жер сілкінді: 70-тен астам адам зардап шекті
ХОЙ. ИРНА - ҚазАқпарат – Иранның солтүстік-батысындағы Хой қаласында жер сілкінісі болды, деп хабарлайды ҚазАқпарат ИРНА-ға сілтеме жасап.
5,7 магнитудалы жер сілкінісі Иран мен Түркия арасындағы шекаралық аймақта, Готур ауданына жақын маңда болған. Жерасты дүмпуі UTC уақытымен 05:52-де тіркелді.
Эпицентрі Иранның Тебриз қаласынан батысқа қарай 141 шақырым қашықтықта және Түркияның Озалп қаласынан оңтүстік-шығысқа қарай 71 шақырым қашықтықта орналасқан. Тереңдігі – бес шақырым. Ирандағы зілзаладан 70-тен астам адам зардап шекті.
Бұдан бұрын хабарлағанымыздай, Иранда болған жер сілкінісінен Түркияның Ван провинциясында Түркияның 9 азаматы мерт болып, 37-сі жарақат алды. Тоғыз адам ауыр халде жатыр.