Инспектор өліміне қатысты деген күдікпен Қызылорда облысының тумалары іздестірілуде

АСТАНА. ҚазАқпарат - ҚР Ішкі істер министрі Қалмұханбет Қасымов Қарағанды облысында «Охотзоопром» инспекторын соққыға жығу оқиғасына қатысты түсінік берді, деп хабарлайды ҚазАқпарат.

Министрдің сөзіне қарағанда, аталған іс бойынша күдіктілер арасында Қызылорда облысының тумалары да бар. Олардың арасында полиция қызметкерлері жоқ.

«Күдіктілердің аты-жөнін, мінген көліктерін анықтадық. Бұл ретте куәгерлер де табылды. Қазіргі кезде күдіктілерге қатысты іздеу жарияланды», - деді Қ. Қасымов.

Бұдан бұрын хабарланғандай, осыдан бірнеше күн бұрын 5 киік атқан браконьерлермен қақтығыста ауыр жарақат алған «Охотзоопром» ӨБ» РМҚК инспекторы Ерлан Нұрғалиев 15 қаңтарда қайтыс болған еді.