Индустрия министрі БҚО жолдарын 2023 жылға дейін жөндеп бітіруге уәде берді
«Мемлекет басшысы бұл жолдарды биыл қолданысқа беруді тапсырған болатын. Өйткені бұл адамдардың өмірімен тікелей байланысты. Өкінішке қарай, мұның обьективті де, субьективті де себептері бар. Бірінші кезеңде қаржыландыру көлемі жеткіліксіз болды. Бұл жөндеу жұмыстарын тұтас жұмылдырып ұйымдастыруға мүмкіндік бермеді. Бірақ бұл бізді, осы іске байланысы бар жауапты қызметкерлерді жауапкершіліктен босатпайды. Жолдар қайткен күнде де салынып бітеді», - деді Қайырбек Өскенбаев Үкімет отырысынан кейін БАҚ өкілдеріне берген сұхбатында.
Сондай-ақ, ол бұл өңірдегі жол жөндеу жұмыстары толық атқарылғанша министрлік пен «ҚазАвтоЖол» мамандары Батыс Қазақстанда тұрып жұмыс істейтінін еске салды.
«Олардың ішінде «ҚазАвтоЖол» кәсіпорны төрағасының орынбасарлары мен министрлік мамандары бар. Олар бұл бағытта биылға жоспарланған жұмыстар толық аяқталғанша сонда болады.
Кеше мен мердігерлерді жинап, кесте құрдық. Жөндеу жұмыстарын барынша жылдамдатуды тапсырдым. Батыс Қазақстанда жол құрылысына қажетті қиыршық тас пен инертті матреиалдар жоқ. Не Ақтөбе облысынан, не Ресей Федерациясынан әкелу керек. Негізі мердігерлер тендерге қатысар кезде бұл сияқты логистикалық мәселелердің бәрін алдын ала пысықтау керек болған. Қазір «ҚТЖ»-ны шақырдық. Олар барынша көмек көрсетіп жатыр. Негізгі міндет мердігерлердің мойнында. Өйткені қажетті қаражат дер кезінде бөлінген болатын. Биыл жолды ашсақ, келесі жылы тұтас жұмысты тәмамдаймыз», - деді министр.
Бұған дейін Президент ұзақ жылдар бойы шешілмей келе жатқан Батыс Қазақстан облысындағы күре жолдар проблемасы бойынша Үкіметке және аймақ басшысына тапсырмалар жүктеген еді. Сондай-ақ аталған себептерге байланысты Индустрия және инфрақұрылымдық даму вице-министрі Берік Камалиев қызметінен босатылған болатын. Ал бүгін Батыс Қазақстан облысында жол жөндеу жұмыстарының кешігуіне байланысты «QAZAVTOJOL «ҰК» АҚ және ҚР ИИДМ Автомобиль жолдары комитетінің бірқатар қызметкерлері жауапқа тартылған болатын.