Индонезиядағы көшкін: 60-тан астам адам үйінді астында қалды

АСТАНА. ҚазАқпарат - Сәрсенбіде Индонезияның Сулавеси аралындағы заңсыз алтын өндіріп жатқан кеніш опырылып, бір адам қаза тауып, тағы 60-тан астамы үйінді астында қалған. Бұл туралы «ҚазАқпарат» ХАА Reuters агенттігіне сілтеме жасап хабарлайды.

Табиғи апаттардың салдарын жою ұлттық агенттігінің ресми өкілі Сутопо Нугрохоның айтуынша, қайғылы оқиға Солтүстік Сулавеси провинциясының Болаанг-Монгондоу округінде орналасқан кеніште болған. Көшкін салдарынан алтын өндіретін кеніштің төбесін ұстап тұратын құрылымдар қираған. Кем дегенде бір адам қаза тапқан. Құтқарушылар әзірге үйінді астында қалған адамдардың 13-ін шығарды.

Еске сала кетейік, 27 қаңтарда Орталық Сулавесиде болған су тасқыны кезінде де көшкін болып еді. Сол шқта 68 адамның өмірі қиылып, 47 адам жарақат алған, тағы 3 мыңнан астам жергілікті тұрғын баспанасынан айырылған болатын.

Ал былтыр қыркүйекте болған 7,4 балдық зілзала салдарынан 2 мыңнан астам адам қаза тауып, зардап шеккендер саны 10,6 мыңнан асқан еді.