ІІМ детективтік шығармалар конкурсын жариялады
«Енді бұқаралық ақпарат құралдарының өкілдеріне, жазушыларға, құқық қорғау құрылымдарының ардагерлеріне және барлық шығармашылық ортаға пайдалы болатын тағы бір ақпарат: ІІМ Қазақстан тарихында алғаш рет «Серт» республикалық детективтік шығармалар конкурсын ұйымдастыруды қолға алды. Конкурс Қазақстан Республикасы Тәуелсіздігінің 30 жылдығын мерекелеу шеңберінде өткізіледі. Байқаудың мақсаты – халықтың құқықтық санасы мен құқықтық мәдениетін, сондай-ақ қазақстандық патриотизмді арттыру. Ішкі істер органдарының қызметкерлерін Отанға қалтқысыз қызмет етуге, ант пен қызметтік парызға адал болуға тәрбиелеу», - деді ІІМ ресми өкілі Нұрділдә Ораз онлайн баспасөз мәслихатында.
Конкурс ережелерімен Ішкі істер министрлігінің ресми парақшасында, әлеуметтік желілер мен Полиция.кз сайтында танысуға болады. Байқау қорытындысын елімізге танымал ақын-жазушылар, сыншылар мен әдебиеттанушылар, қоғам қайраткерлері, журналистер және ішкі істер органдарының ардагерлері шығарады.