Ханчжоу - Алматы әуе рейсімен алғашқы жолаушылар ұшып келді

АЛМАТЫ. ҚазАқпарат – Қытайдың әуе компаниясы Қазақстан бағытында рейс ашты, деп хабарлайды ҚазАқпарат Көлік министрлігінің Азаматтық авиация комитетіне сілтеме жасап.

Қазақстан Республикасы мен Қытай Халық Республикасы авиациялық биліктерінің бірлескен жұмысының арқасында бүгін қытайлық «Loong Airlines» әуе компаниясы Ханчжоу - Алматы бағыты бойынша алғашқы жолаушылар рейсін орындады. А321 үлгісіндегі әуе кемелері аптасына 3 рет (сейсенбі, бейсенбі және сенбі күндері) ұшады.

«Жаңа әуе тасымалдаушының Қазақстан әуе тасымалы нарығына кіруі, сондай-ақ жаңа әуе бағытының ашылуы елдер арасындағы сауда-экономикалық, туристік және мәдени ынтымақтастықты одан әрі дамытуға ықпал етеді», - делінген комитет мәлімдемесінде.

Айта кетсек, Ханчжоу қаласы – Чжэцзян провинциясының астанасы. Қала халқының саны – 10 млн. 23 қыркүйек пен 8 қазан аралығында қалада 19-шы Азия ойындарын өткізу жоспарланып отыр. Ханчжоу қаласының әуежайы – Қытайдағы ең көп жұмыс істейтін 10 әуежайдың бірі.