Халыққа тегін қызмет көрсеткен медицина ұйымдарына 599,3 млрд теңге төленді

АСТАНА. ҚазАқпарат - «Әлеуметтік медициналық сақтандыру қоры» АҚ 2018 жыл басынан бері халыққа тегін қызмет көрсеткен медицина ұйымдарына 599,3 млрд теңге төледі.  Бұл туралы ҚазАқпарат Қордың баспасөз қызметіне сілтеме жасап хабарлайды.

«7 қарашадағы мәлімет бойынша, Қормен келісімшарт бекіткен жеткізуші компанияларға 599,3 млрд теңге төленді. Бұл жалпы кепілдендірілген тегін медициналық көмек пакеті шеңберінде бекітілген келісімшарт сомасының 76 пайызы», - дейді МСҚ басқарма төрағасының міндетін атқарушы Ботагөз Жақселекова.

Естеріңізге сала кетсек, медициналық сақтандыру қоры  тегін медициналық көмек пакеті Т және міндетті әлеуметтік медициналық сақтандыру пакеттерінің қаржылық операторы болып табылады. Қор емдеу мекемелерімен мемлекеттік тапсырыс бойынша халыққа тегін көмек көрсету жөнінде келісімшарттар бекіткен болатын. Бекітілген келісімшарттардың жалпы сомасы 785,8 млрд теңге. 

«Жұмыс кестеге сай жүріп жатыр. Бөлінген қаражат медицина мекемелерінің операциялық шығындарын өтеуге жеткілікті», - деді Б.Жақселекова.

Айта  кетсек, Қор мемлекеттік тапсырыс бойынша 1374 медицина ұйымымен келісімшарт бекіткен. Оның 638-і - жеке меншік. Биыл жеке клиникалар саны 2017 жылмен салыстырғанда 177-ге артқан. Ал, олармен бекітілген келісімшарт сомасы 2 есе өсіп, 125,1 млрд теңгені құрады.