Гүлшара Әбдіқалықова Тараз қаласына жұмыс сапарымен барды
Мемлекеттік хатшы Қазақстандағы Өзбекстан жылы аясында өткен іс- шараларға қатысты.
Жиынға, сондай-ақ, Жамбыл облысының әкімі А.Мырзахметов, Өзбекстан Әйелдер комитеті төрайымының орынбасары М.Нурматова, ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссияның мүшелері, мемлекеттік органдар және қалың жұртшылық өкілдері қатысты.
Шарада жұрт алдында сөз сөйлеген Гүлшара Әбдіқалықова Елбасы Нұрсұлтан Назарбаевтың: «Ұлттық салт-дәстүріміз, тіліміз бен музыкамыз, әдебиетіміз, той-жоралғыларымыз, бір сөзбен айтқанда, ұлттық рухымыз бойымызда мәңгі қалуға тиіс», - деген сөзіне баса назар аударды.
Іс-шаралар аясында «Атамекен» өңірлік кәсіпкерлер палатасының (ӨКП) Іскер әйелдер кеңесі және «Қазақстанның іскер әйелдері қауымдастығы» республикалық қоғамдық бірлестігі (РҚБ) өкілдерінің Өзбекстаннан келген әріптестерімен кездесулері өтті. Сонымен бірге Жамбыл облысы мен Өзбекстан арасындағы туристік қызмет көрсету саласын дамытудағы ынтымақтастық пен туризмді ұйымдастыру ісін жетілдіру жөнінде келісімге қол жеткізілді.
Сапар барысында Мемлекеттік хатшы М.Х.Дулати атындағы Тараз мемлекеттік университетінің 60 жылдығына арналған іс-шараларға да қатысты. Бүгінгі таңда университетте 685 профессор және оқытушы қызмет етеді, 12 мыңнан астам студент білім алып жатыр. 14 оқу-зертхана кешендері және заманауи құрал-жабдықтармен қамтамасыз етілген 155 зертхана - солардың игілігінде.
Гүлшара Әбдіқалықова оқытушылар мен студенттерді Мемлекет басшысының «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауын белсенді жүзеге асыруға шақырды. Сондай-ақ, Мемлекеттік хатшы салтанатты түрде «Университет шежіресі» монументін, заманауи спорт кешенін ашып, студенттерге арналған 500 орындық жатақхана құрылысының алғашқы кірпішін қалау рәсіміне қатысты.