01:14, 21 Маусым 2018 | GMT +6
Головкин мен Альварестің рематчын әлемнің 150 елі көрсетеді
АСТАНА. ҚазАқпарат - Қазақстандық боксшы Геннадий Головкиннің (38-0-1, 34 КО) промоутері Том Леффлер GGG мен «Канелоның» қарымта жекпе-жегі қандай елдерде көрсетілетіні туралы айтты, деп хабарлайды Sports.kz.
«Геннадий Головкин мен мексикалық боксшы Сауль Альварестің әлемде фанаттары көп. Әрине, бірінші кезекте жекпе-жекті Ұлыбритания көрсетеді. Өйткені Геннадидің ағылшын жанкүйерлері көп. Орта салмақтағы мықты боксшылардың рематчын әлемнің кем дегенде 150 елі көрсететін болады», - деді Леффлер.
«Канело» - GGG екінші жекпе-жегі 15 қыркүйекте Лас-Вегастағы T-Mobile Arena-да өтеді.
Еске салайық, Головкин мен Альварестің промоутерлері алғашында айқастың болмайтынын растаған еді. Алайда, кейін қайта келісім жүргізіліп, бәріне тиімді шешім қабылданды. Головкин мен «Канелоның» екінші кездесуінің өтетіні ресми түрде жария етілді.