Головкин - Альварес айқасының шарттары аталды
2017 жылғы 14 мамыр 00:32

Головкин - Альварес айқасының шарттары аталды

АСТАНА. ҚазАқпарат - ESPN тілшісі Дэн Рафаэль Геннадий Головкин (37-0, 33 КО) мен Сауль Альварес (49-1-1, 34 КО) жекпе-жегінің параметрлерін айтып берді.

«Рингтің өлшемі - стандартты: 20×20 фут (6,1 шаршы метр). Жеңіліс тапқан жағдайда «Канелода» қарымта кездесуге мүмкіндік болады, Головкинде - жоқ. Салмақ - 160 фунт. Сондай-ақ боксшылар VADA-ның допинг-тестісінен өтеді», - деді Рафаэль.

Айта кетейік, WBA Super, WBC, IBF және IBO нұсқасы бойынша төрт бірдей белбеудің иегері, қазақстандық боксшы Геннадий Головкин және мексикалық Сауль «Канело» Альварестің арасындағы жекпе-жек ағымдағы жылы 16 қыркүйекте өтеді. Бұған дейін Головкиннің маусым айында ұлыбританиялық Билли Джо Сондерспен айқасуы күтілген еді. Алайда қазақстандық боксшының командасы аталған жекпе-жектен бас тартты.

Головкин - Альварес жекпе-жегіне жанкүйерлердің рекордтық саны жиналады деген болжам бар. Осы жекпе-жектің жеңімпазы WBO тұжырымы бойынша орта салмақтағы әлем чемпионы Билли Джо Сондерспен (24-0, 12 КО) кездесуі әбден мүмкін. Ол жайында ұлыбританиялық боксшының промоутері Фрэнк Уоррен де айтып отыр.

Boxingnews24.com сайтының журналисі Дэн Эмброузтың ойынша, Головкинге «сарыбас» мексикалық жұлдызды нокаутпен жеңу керек. Егер бұл айқас та нокаутпен аяқталса, GGG кәсіби бокстың ғана емес, PPV рейтингі шыңына да шыға алады.

Бүгінде әлемдегі ең ірі ареналар Головкин-Альварес жекпе-жегін өз алаңдарында өткізуге ниет танытып отыр. Олар Лас-Вегастағы T-Mobile Arena, Далластағы AT&T Stadium және Нью-Йорктегі «Мэдисон Сквер Гарден» аренасы, кейін бұл тізімге «Уэмбли» (Лондон), «Стэйплс-центр» (Лос-Анджелес) және «Ацтека» (Мехико) стадиондары қосылды.

Автор:
Тілші

Jańalyqtar

MURAǴAT