Геннадий Головкин Штурм-Штиглицтің жекпе-жегін тамашалады

АСТАНА. ҚазАқпарат - Кеше Германияда рингке екінші орташа салмақ бойынша WBO нұсқасы титулының бұрынғы иегері, 33 жастағы Роберт Штиглиц пен орташа салмақтағы әлемнің экс-чемпионы, 35 жастағы неміс спортшысы Феликс Штурм шықты.

Он екі раундтың қорытындысы бойынша бір төреші жеңісті 115-113 есебімен Штурмға, ал екінші төреші дәл осындай есепті Штиглицке берді, үшіншісі болса 114-114 есебімен тең ойын болды деп есептеді. Жекпе-жектен кейін екі боксшы да қарымта матчт өткізуге ниеттерін білдірді.

Бұған дейін бұл айқастың жеңімпазымен кездесуге әзір екендігін мәлімдеген, осы жекпе-жекті тамашалаған WBO бойынша орташа салмақтағы чемпион Артур Абрахам бұл бәсекеде Штурм жеңді деп есептейді. Осында болған орташа салмақтағы WBA чемпионы Геннадий Головкин болса, төрешілерінің шешімімен келісті, деп хабарлайды sports.kz.