Газ желісіне қосылғысы келген атыраулық кәсіпкердің өтініші бір жылдан бері шешімін таппаған

АТЫРАУ. ҚазАқпарат – Атыраулық кәсіпкердің газ желісіне қосылу жөніндегі өтініші бір жылдан бері шешімін таппаған, деп хабарлайды ҚазАқпарат.

Өңірлік коммуникациялар қызметінің мәліметінше, облыстық кәсіпкерлер мен жұмыс берушілер одағында кездесу өткен.

Оған кәсіпкерлер, әкімдіктер мен монополист мекемелердің өкілдері қатысты.

Шағын және орта бизнес өкілдерінің айтуынша, кәсіпкерлік нысандар үшін жер бөлуде туындаған проблема бар.

Жергілікті билік өкілдері кәсіпкерлермен ашық диалог орнатуға ынталы емес.

«Мемлекет басшысы Қасым-Жомарт Тоқаев халыққа Жолдауында «Ашық әкімдік» жұмысын жандандыру мәселесін айтқан еді. Осы бастама аясында біз әкімдік өкілдерімен ашық диалогта кездесу ұйымдастырдық. Бұл кездесуден соң ортақ шешімдер қабылданады деген ойдамын», -дейді Атырау облыстық кәсіпкерлер мен жұмыс берушілер одағының басшысы Айбар Жаниязов.

Мәселен, «Могикан» шағын зауытының басшысы Айсұлу Оразбаеваның пікірінше, жергілікті әкімдіктер тарапынан отандық кәсіпке қолдау керек.

«Біз өндірісті дамыту арқылы ғана еліміздің көркеюіне үлес қоса аламыз. Себебі, жаңа жұмыс орындары ашылып, кәсіпкерлер саны көбейеді. Алайда, өндіріс орнын ашқан кәсіпкерлерде тауар сату проблемасы туындап отыр. Мәселен, мен жуғыш заттарды шығаратын шағын зауыт аштым. Бұл – Атырау облысындағы алғашқы өндіріс. Алайда, біздің тауарымыз тек базарда ғана өтімді болып тұр. Өнімдерімізді жергілікті мекемелер, ауруханалар алса, өндірістің қанат жаюына жол ашылар еді», -деді Айсұлу Оразбаева.

Сондай-ақ, кәсіпкерлер инфақұрылым мәселесін де көтерді. Он екі жылдық тәжірибесі бар Майра Мұханбетова құрылысы аяқталған спорт залға жылу жүйесін тарта алмай жүр.

«Мен 2018 жылдан бері жастардың спорт командасына демеуші болып келемін. Атырау қаласында футзалдың аздығынан жастарға арналған спорт залын ашуды қолға алдым. Осыған байланысты 2020 жылы субсидия алып, кешеннің құрылысын аяқтадық. Жылу жүргізу үшін газ желісіне қосылу керек. Сол себептен, былтырғы наурызда «ҚазТрансГазАймақ» АҚ-ға өтініш бердім. Алайда, арада 1 жыл өтсе де бұл мекеме бізге газ жүргізуге рұқсатын берген жоқ. Жанымызда салынған үйлерде газ бар. Ал, бізге жетпей тұр. Біздің осы мәселеміз шешілмей келеді», -деді Майра Мұханбетова.

Еске сала кетелік, бұдан бұрын Атырау облысында 23 мыңға жуық жұмыс орны ашылатынын хабарлаған болатынбыз.