Ғани Сәдібеков пен Бақытжан Жақсалиевті үйқамақта ұстау мерзімі ұзартылды

АСТАНА. ҚазАқпарат - Бұрынғы ҚР Энергетика вице-министрлері Ғани Сәдібеков пен Бақытжан Жақсалиевті үйқамақта ұстау мерзімі 1 қыркүйекке дейін ұзартылды, деп хабарлайды ҚазАқпарат тілшісі. Бұл туралы Астана қаласы №2 Алматы аудандық сотының баспасөз қызметі мәлім етті.

Сонымен бірге, күдікті Серікбай Жұмалиновты қамауда ұстау мерзімі 1 қыркүйекке дейін, Жан Нұрбековты үйқамақта ұстау 2018 жылдың 2 қыркүйегіне дейін ұзартылды.

Энергетика вице-министрі Ғ. Сәдібековке «Аймақ» ЖШС мердігерлік ұйымының басшысы Д. Дуанбекпен сөз байласып, Щучинск-Бурабай курорттық аймағындағы көлді тазартуға бөлінген аса ірі мөлшердегі бюджет қаражатын жымқырды деген айып тағылып отыр. Қылмысқа Энергетика министрлігінің департамент басшысы Ж. Нұрбеков және мердігер ұйымның өкілдері С. Жұмалинов және Б. Қадырберлин де қатысқан.

Ал, Бақытжан Жақсалиев Щучинск-Бурабай курорттық аймағындағы көлді тазарту бойынша жұмыстарды қабылдау барысындағы заңға қайшы әрекеттерге барды деп айыпталды. Күдікті вице-министр 2015 жылы «Аймақ и К» ЖШС мердігер ұйымының мүддесі үшін лауазымдық өкiлеттiгін асыра пайдаланған.

Мемлекеттік қызмет істері және сыбайлас жемқорлыққа қарсы іс-қимыл агенттігінің Сыбайлас жемқорлыққа қарсы іс-қимыл ұлттық бюросының хабарлауынша, Б.Жақсалиев орындалған жұмыстың көлемі 30 есе артық бағаланғанын біле отырып, жалпы сомасы 863 млн теңгені құрайтын су қоймасының түбінен 109 мың текше метр шөгінділерді алу туралы актілерге қол қойып, аталған соманы мердігерге аударған. Сот сараптамасының қорытындысы бойынша аяқталмаған жұмыстардың құны 746 млн теңгені құрады.