Ǵalymdar Almatynyń atmosferalyq modelin jasamaq

None
None
ALMATY. QazAqparat - Ǵalymdar Almatynyń lastanǵan aýasyn zertteý úshin shaǵyn atmosferalyq model jasamaq. Bul týraly PhD doktory, «Ǵaryshtyq zertteýler men tehnologıalar» AQ janyndaǵy «Ionosfera ınstıtýty» AQ atmosfera fızıkasy sektorynyń meńgerýshisi Alekseı Andreev Tıan-Shan astronomıalyq ekspedıtsıasynda aıtty, dep habarlaıdy QazAqparat tilshisi.

«Bizdiń ınstıtýt birqatar ǵylymı joba usynbaq. Atap aıtqanda, qalanyń mıkroklımatyn zerttesek degen oı bar. Almaty turǵyndaryn lastanǵan aýa máselesi qatty alańdatady. Osy maqsatta biz atmosferalyq model jasaı alamyz. Bul fızıkalyq, kompıýterlik baǵdarlama. Ol jerge jaqyn aýa qabatyn modeldeımiz», - dedi Alekseı Andreev.

Onyń aıtýynsha, jańa tehnologıa qala ómirin modeldeýge múmkindik beredi. Qaı stansa - qansha zıandy zat shyǵaratynyn, qaı aýdandarda qansha avtokólik zıandy zat bóletinin anyqtaýǵa bolady.

«Bul jumys arqyly bolashaqta qalanyń qaı aýdandarynda qara tútin qalyptasatynyn aldyn ala anyqtaýǵa bolady. Soǵan qaraı qala bıligi qaı aýdanda qurylys salýǵa bolatynyn sheshedi. Keıbir aýdandarda bıik ǵımarat salý qaladaǵy aýa aǵynyna keri áserin tıgizýi múmkin», - dedi ǵalym.

Zertteý jumysy úshin baǵdarlamashy, fızık, meteorolog mamandardan turatyn jumys toby qurylady.

«Múmkin JES-ty qaladan bir shaqyrym ary jyljytýymyz kerek bolar. Sonda qalany basqan qara tútin seıiledi dep esepteımiz. Ony model júzinde teksermesek, esh nátıje shyǵara almaımyz. Álemde barlyq qalalar osylaı salynady», - dedi ol.

Соңғы жаңалықтар