Футзал: Қазақстан құрамасы елордада Израильді қабылдайды

НҰР-СҰЛТАН. ҚазАқпарат - Футзалдан Қазақстан құрамасының 2022 жылғы Еуропа чемпионаты топтық іріктеу кезеңінде бүгін, 9 cәуірде елордада Израильмен кездеседі, деп хабарлайды ҚазАқпарат тілшісі.

Бұған дейін қазақстандық футзалшылар төрт ойын өткізді. Олар Венгрия (5:0, 6:1) мен Беларусьті (5:2, 6:1) қапы қалдырып кетті. Төрт турда бірде-бір ұпайды шашау шығармаған құрама 12 ұпай жинап, екі тур бұрын жарыстың финалдық кезеңіне жолдама алып қойды . Одан кейінгі орындардағы Венгрия мен Беларусьтің -6, Израильдің 3 ұпайы бар.

Бүгінгі ойын елорда уақытымен 16.50-де басталып, «Qazsport» телеарнасынан тікелей эфирде көрсетіледі.

Айта кетерлігі, екі құрама Нұр-Сұлтанда 11 сәуірде тағы бір кездесу өткізеді. Аталған топта 13 сәуірде Беларусь және Венгрия құрамалары шеберлік байқасады. Осылайша іріктеу кезеңі мәресіне жетеді.

Еуропа чемпионатының финалдық сатысы 2022 жылдың 19 қаңтар және 6 ақпан аралығында Нидерландының Амстердам және Гронинген қалаларында өткізіледі.