ФУТБОЛ: «Астана» ақтөбеліктерді ойсыратып кетті
Алматыда жергілікті «Қайрат» Премьер-лигаға жылдық үзілістен кейін қайта оралған «Тараз» командасын қабылдады. Бұл кездесуде алматылық футболшылар екі гол салды. Екеуінде де «Қайраттың» жас ойыншылары мергендік танытты. Атап айтқанда, 26-минутта Рифат Нұрмұғаметтің қанжығасы майланса, 67-минутта Айбол Әбікен қақпа торын бүлк еткізді. Ойында «Қайрат» 2:0 есебімен басым түсті.
Қызылордада «Қайсар» өз алаңында «Атыраумен» шеберлік байқасты. Бұл ойында алаң иелері кездесудің өне бойында шабуылға шыққанымен дегеніне жете алған жоқ. Кездесу тағдырын 2-минутта соғылған жалғыз доп шешті. Оны «Атырау» сапынан Дәурен Мәжитов соқты. Осылайша «Қайсар» қарсыласына 0:1 есебімен жол берді.
Алғашқы тур ойындары Астана қаласында мәресіне жетті. Елордалық «Астана» өз алаңында «Ақтөбені» қабылдады. Кездесуде «Ақтөбе» командасы есеп ашқан еді. Олардың сапынан Абат Айымбетов 3-минутта мергендік танытты. Алайда 19-минутта «Астана» оған жауап қайырды. Олардың сапынан Марин Томасов қанжығасын майлады. Ал 33-минутта елордалық клуб алға шықты. Бұл жолы Юрий Логвиненко гол соқты. Марин Томасов 38-минутта бұл кездесудегі екінші голын салды. Кездесудің 95-минутында астаналық Юрий Перцух қорытынды есепті белгіледі. Кездесуде «Астана» 4:1 есебімен жеңіске жетті.
Алғашқы турдың үш ойыны кеше, 9 наурызда өткізілді. Бұл күні «Ордабасы» «Шахтерді» 3:0, «Жетісу» «Оқжетпесті» 5:1, «Тобыл» «Ертісті» 3:0 есебімен жеңді.
Келесі тур ойындары 15 наурыз күні өтеді. Бұл күні «Астана» мен «Оқжетпес», «Атырау» мен «Ертіс», «Қайрат» пен «Шахтер», «Қайсар» мен «Жетісу», «Ордабасы» мен «Ақтөбе», «Тобыл» мен «Тараз» кездеседі.