Футбол: «Ақжайық» Сербияның командасымен кездесті
«Ақжайық» футбол клубының баспасөз қызметінен түскен мәліметке қарағанда, оралдықтар Сербияның «Динамо» (Вранье) командасымен алаңға шықты. «Динамо» - өз еліндегі бірінші лигадан суперлигаға шыққан клуб.
«Ақжайықтың» бас бапкері, украиналық маман Владимир Мазяр кейбір ойыншыларды орындарын ауыстырып, қарады. Яғни, басты мақсат - нәтиже емес, футболшыларды сынап көру. Соған байланысты команда құрамы нақтыланатын болады. Бұл байқау ойынында «Динамо» командасы 3:0 есебімен жеңіске жетті.
Мұның алдында «Ақжайық» армениялық «Бананцпен» (Ереван) 1:1 есебімен тең ойнаса, «Дьер ЭТО» (Венгрия) және Сталь Мелец» (Польша) командаларына 0:1 есебімен есе жіберген болатын.
Еске сала кетейік, футболдан премьер-лига командалары арасында Қазақстан чемпионатында өнер көрсететін «Ақжайықтың» Түркиядағы екінші жаттығу жиыны 1 наурызда мәреге жетеді.
Биылғы біріншіліктегі алғашқы ойынын оралдықтар 11 наурыз күні Астанада ел чемпионымен өткізеді. Содан кейін 17 наурызда Қызылордада «Қайсармен» ойнайды. Өз алаңында 31 наурызда Павлодардың «Ертісін» қабылдайды.