Францияда бір жылда 1 млн адам темекіні тастаған

АСТАНА. ҚазАқпарат - Францияда соңғы онжылдықта темекі тартатындар санының азаюы рекордтық көрсеткішке жетті. Бұл туралы ВВС хабарлайды.

2016-2017 жылдармен салыстырғанда олардың саны миллионға қысқарған. Франция қоғамдық денсаулық сақтау қызметі жүргізген әлеуметтік сауалнаманың қорытындылары осыны растап отыр.

Зерттеу нәтижелеріне қарағанда, 2016 жылы 18-75 жас аралығындағы франциялықтардың 29,4%-ы темекі шексе, былтыр бұл көрсеткіш 26,9%-ды құраған.

Әсіресе, жастар мен табысы аз тұрғындар арасында темекіден бас тартып жатқандар көп. Мамандар бұған себеп ретінде жуырда Францияда темекіге қарсы нормаларға енгізілген өзгерістерді көрсетіп отыр. Атап айтқанда, соңғы жылдары елде темекі маркаларының орамдарын біркелкі ету, темекі өнімдерінің бағасын көтеру, темекіні тастауға әрекет етіп жүргендерді ынталандыру, Ұлттық темекіге қарсы күн сияқты шаралар оң нәтижесін берген.