Федерация кубогы: Ұлыбритания - Қазақстан матчын Зарина Дияс бастайды

НҰР-СҰЛТАН. ҚазАқпарат - 20-21 сәуір күндері Лондонда Федерация кубогы ІІ Әлемдік тобының плей-офф кезеңінде Ұлыбритания мен Қазақстан командалары кездеседі, деп хабарлайды ҚазАқпарат тілшісі.

Матч бүгін Зарина Дияс пен Йоханна Контаның бәсекесімен ашылады. Әлемнің 46-ракеткасы Й.Контаны Ұлыбритания құрамасының белді теннисшісі деуге болады. Дүниежүзілік рейтингте 107-сатыда тұрған З.Диястың да барын салары сөзсіз. Содан кейін Қазақстанның бірінші, әлемнің 38-ракеткасы Юлия Путинцева рейтингте 86-орындағы Кэйти Бултермен кортқа шығады.

Екінші күні Ю.Путинцева мен Й.Конта, З.Дияс пен К.Бултер шеберлік байқасады. Жұптық сында Галина Воскобоева мен Анна Данилина ұлыбританиялықтар Хезер Уотсон мен Хэрриет Дартпен кездеседі. Қазақстан құрамасының капитаны Диас Досқараев қыздардың толықтай дайын екендігін, жеңіс үшін аянбайтындығын жеткізді.

Еске сала кетейік, бұдан бұрын Зарина Диястың ел намысын қорғауды бақыт санайтынын жазған болатынбыз. Ал ерлер арасында Александр Бублик Мексикадағы турнирдің ширек финалына шыға алмай қалды.