Федерация кубогы: Лондондағы Ұлыбритания - Қазақстан матчында корт иелері алға шықты

НҰР-СҰЛТАН. ҚазАқпарат - Лондонда Федерация кубогы ІІ Әлемдік тобының плей-офф кезеңінде Ұлыбритания мен Қазақстан матчын Зарина Дияс бастады, деп хабарлайды ҚазАқпарат тілшісі.

Дүниежүзілік рейтингте 107-орында тұрған қазақстандық теннисші әлемнің 46-ракеткасы Йоханна Контамен күш сынасты.

Кездесуді сәтті бастаған З.Дияс бірінші партияны 6:4 есебімен ұтты.

Екінші сетте қарсыласы 5:1 есебімен алға кетті. Қазақстандық теннисші есепті қысқартқанымен, Конта күш бермеді - 6:3.

Үшінші, шешуші партияда бірінші геймде Зарина брейк-пойнтты пайдалана алмады. Есесіне ұлыбританиялық теннисші қос бірдей брейк жасады - 4:1. Бұдан кейін З.Дияс брейкпен есепті қысқартты - 2:4. Әйтсе де Конта тағы бір брейкке қол жеткізді - 5:2. Ақыры ол өзі доп бергенде, қателеспеді - 6:2.

Тартысты өткен бәсеке 2 сағат 40 минутқа созылды.

Осылайша ұлыбританиялықтар 1:0 есебімен алға шықты.

Екінші кездесуде Қазақстанның бірінші, әлемнің 38-ракеткасы Юлия Путинцева рейтингте 86-орындағы Кэйти Бултермен кортқа шықты.

Еске сала кетейік, бұдан бұрын Зарина Диястың ел намысын қорғауды бақыт санайтынын және Ұлыбритания - Қазақстан матчын бастайтынын жазған болатынбыз.

Ал ерлер арасында Александр Бублик Мексикадағы турнирдің ширек финалына шыға алмай қалды.

Тағы бір қазақстандық Дмитрий Попко АҚШ-та Ориндж-Парк ITF турнирінің жартылай финалына шықты. Ол ширек финалда болгариялық Адриан Андреевті 7:6 (7:4), 6:3 есебімен ұтты. Бұл матч 2 сағат 44 минутқа созылды.

Д.Попко финалға шығу үшін доминикандық Хосе Оливареспен таласады.