Еуропа лигасы: «Қайрат» армениялық клубпен шеберлік байқасады

НҰР-СҰЛТАН. ҚазАқпарат - Бүгін UEFA Еуропа лигасы 2020/2021 жылғы кезеңінің алғашқы іріктеу сатысында Алматының «Қайраты» Арменияның «Ноа» командасын қабылдайды, деп хабарлайды ҚазАқпарат тілшісі.

Армениялық клубтың құрылғанына бар-жоғы үш жыл ғана толды. Алғашқыда команда «Арцах» деп аталған болатын. 2019 жылы клубтың аты «Ноа» болып өзгерді. Командаға молдавиялық Игорь Пикущак пен Вадим Борец сынды бапкерлер жетекшілік етті. Аталған клуб былтыр өз елінің чемпионатында күміс жүлдегер атанып, Армения кубогын иеленді. Команда ел астанасы – Ереван қаласының атынан сынға түседі. Өз алаңындағы ойынды «Алашкерт» стадионында қабылдайды.

Команда құрамында армениялық ойыншылармен қатар Латвия, Ресей, Гвинея-Бисау, Колумбия, Литва, Украина, Италия, Молдавия, Португалия елдерінен келген футболшылар бар. Солардың бірі – колумбиялық Жорди Монрой Колумбияда дүниеге келген, оның анасының ұлты – армян. Сондықтан ол 2018 жылдан бері Армения ұлттық құрамасы сапында ойын көрсетіп келеді. Сондай-ақ, команда құрамында қазақстандық есімі жақсы таныс украиндық Денис Дедечко да бар.

Естеріңізге сала кетелік, ол 2015 жылы «Астана» намысын қорғап, 10 ойында 1 гол соқты. Командада қақпашы қызметін итальяндық Валеро Вимеркати атқарады. Ол Италияның «Милан» командасының жастар құрамында ойнаған. Одан кейін өз елінің, Португалияның «Фатима» және «Лейрия» клубтарында ойын көрсетті. Өткен жылдан бастап «Ноа» құрамына қабылданды.

Армениялық клуб өз тарихында алғаш рет еурокубок ойындарында бақ сынауға мүмкіндік алды. Сондықтан жарыстың келесі сатысына жолдама алуға бар күшін салуға ниет жасап отыр.

«Қайрат» командасы жылдағыдай биыл да топтық кезеңге шығуды алдына мақсат етіп қойып отыр. Сол күшін өз құрамына көптеген белгілі ойыншыларды қосты. Олардың қатарында кезінде Ресейдің ЦСКА (Мәскеу) командасында доп тепкен бразилиялық әйгілі футболшы Вагнер Лав алдымен аталады. Одан басқа да футболшылар бүгін «Қайраттың» жарыстың келесі сатысына берілетін жолдаманы қол жеткізуіне үлкен үлес қосады деген сенім бар.

«Қайрат» пен «Ноа» командалары арасындағы кездесу елорда уақытымен 20.00-де басталады. Ойын Qazsport телернасынан тікелей эфирде көрсетіледі.

Сондай-ақ, бүгін Шымкентте «Ордабасы» мен Румынияның «Ботошани» командасын қабылдайды .